GORESPENAK
Agurra
V/. Zatozkit lagun, ene Jainko.
R/. Jauna, zatoz laster ni laguntzera.
V/. Aintza Aitari eta Semeari eta Espiritu Santuari.
Hasieran zen bezala orain eta beti
gizaldi eta gizaldietan. Amen.
1 Ant. Egidazu auzi, Jainko; begitu naizu gizon maltzur eta makurragandik.
42 Salmoa
Egidazu auzi, Jainko,
zaindu nire auzia bihotz bako jenteagandik,
begitu eidazu gizon maltzur eta makurragandik.
Jainko, nire babesa Zeu zara-ta:
zergaitik haizatu nozu?
Eta zergaitik nabil goibel,
etsaiak zapaltzen nauala?
Bialdu zure argia ta zure egia, eurek eroan naien,
zure mendi santura, zure gurtza-etxolara, sartu naien.
Eta sartuko naz Jainkoaren altarara,
poz eta atsegin dodan Jainkoagana,
kitaraz goretsiko zaitut, Jauna, ene Jainkoa.
Zergaitik zagoz, ene arima, lur-jorik?
Zergaitik, egon ezinik?
Itxaron Jainkoagan, barriro be Bera dot-eta goretsiko,
nire aurpegiaren salbazino eta nire Jainko.
Aintza Aitari eta Semeari
eta Espiritu Santuari.
Lehen lez, orain eta beti,
eta amaibako egunetan. Amen.
Ant. Egidazu auzi, Jainko; begitu naizu gizon maltzur eta makurragandik.
2 Ant. Zeure gain hartu duzu, Jauna, nire auzia; onik atara dozu nire bizia, ene Jainko.
Kantika: Is 38, 10-14. 17-20
Holan ninoan: «Joan beharrean nago nire egunen erdian;
Lezako ateetan itziko nabe
gelditzen jatazan urteetan».
Holan ninoan:
«Ez dot barriro Jauna ikusiko bizien lurrean,
ez dot barriro gizakirik ikusiko lurtarren artean.
Erauzi eta kendu egin deuste bizilekua,
artzainen oihal-txabola lez;
euliek lez hariltzen neban nire bizia,
eta moztu egin deustazu haria».
Gau ta egun hondatzen nozu,
goizera arte oihuka naukazu.
Lehoi batek lez, hazur guztiak xeatzen deustazuz.
Txioka dihardut elaia lez,
urruka usoa lez;
makaltzen jataz begiok gora begira;
Jauna, larri naz, heldu zakidaz!»
Hara, osasun bihurtu da nire gaixoaldia,
Zeuk gorde dozu-ta heriotza-zulotik nire bizia,
zeure atzera jaurti dozuz nire hoben guztiak.
Ez zaitu, ez, Lezeak eskertzen,
ez Heriotzeak goresten,
zulora doazenek ez dabe zure leialtasuna itxaroten.
Bizidunak, bizidunak baino ez zaitu eskertzen,
neuk orain lez;
aitak iragartzen deutse seme-alabei zure leialtasuna.
Zatorkidaz, Jauna, salbatzera,
eta joko dogu soinua, Jaunaren etxean,
bizi garan egun guztietan.
Aintza Aitari eta Semeari
eta Espiritu Santuari.
Lehen lez, orain eta beti,
eta amaibako egunetan. Amen.
Ant. Zeure gain hartu duzu, Jauna, nire auzia; onik atara dozu nire bizia, ene Jainko.
64 Salmoa
Zeuri dagokizu, Jainko, goratzarre Sionen,
† Zuri zin-eginak betetzen dabez.
Entzuten dozu-ta eskaria,
Zeugana dator hobenakaitik gizakia.
Gaiztakerien zamapean gaituzu,
baina Zuk parkatu egiten dituzu.
Bai dohatsu, Zuk bereizirik hartzen dozuna,
zure atarietan daukazuna;
asetu gaizala zure etxeko onak,
zure jauretxeko santutasunak.
Zintzotasun harrigarriz gaituzu entzuten,
Jainko, gure Salbatzaile,
lur-muga guztien itxaropide,
urruneko itsasoen ustebide.
Zeuk sendotzen dozuz mendiak zeure ahal-izatez,
gerria jantzirik indarrez.
Zeuk baretzen dozu itsas-orroa,
olatuen hotsa eta herrien orroa.
Zure mirariz lur-bazterrak bildurtzen dituzu,
sortalde-sartaldeak mugaz-muga pozez betetzen dituzu.
Agertu zaiakoz lurrari eta euriz beratu dozu,
oparo aberastu dozu.
Jainko-ibaia urez da betea, emon deutsezu gari-garaua,
Zeuk atondu dozu-ta lurra holan.
Urez asetu dituzu ildoak, lurrak bardindu,
euriz bigundu eta erne-muinak bedeinkatu.
Zeure ondasunez burutu dozu urtea,
guritasunez dariola dagoz zure bideak.
Mendiko larrak hortxe dagoz guri,
eta munoak atseginez apaindurik.
Zelaiak artaldez jantzi dira, ibarrak gariz estaldu,
txaloka eta kantari.
Aintza Aitari eta Semeari
eta Espiritu Santuari.
Lehen lez, orain eta beti,
eta amaibako egunetan. Amen.
3 Ant. Nire zerbitzariak zuzentasuna emongo deutso askori, hareen hutsegiteak bere gain hartuz.
Ant. Nire zerbitzariak zuzentasuna emongo deutso askori, hareen hutsegiteak bere gain hartuz.
Za 12, 10-11a
Grazi-espiritua eta otoitz-espiritua isuriko dot Dabiden etxe-gainera eta Jerusalemgo bizilagunetara; begiak Neugana jasoko dabez, zulatu ninduen Honengana. Eta negar egingo dabe, seme bakarrarentzat egiten dan lez; negar samina egingo dabe, lehen-semearentzat egiten dan lez. Egun haretan negar-hots handia izango da Jerusalemen.
R/. Zeure odolaz * erosi gaituzu, Jauna. Zeure.
V/. Leinu eta hizkuntza, herri eta enda
guztietakoak. Erosi.
R/. Aintza Aitari. Zeure.
Bened. ant. Aita, goretsi naizu zure ondoan, mundua mundu izan baino lehen Nik zeure ondoan neban aintzaz.
Bedeinkatua Jauna, Israelgo Jainkoa
agertu eta bere herria askatu dauana;
salbamen indarra deusku emon,
bere morroi Dabiden etxean.
Halan eukan-eta berbea emonda bere santuen bidez,
behinola bere profeta ebazanen bidez;
salbamena gure arerioen menpetik,
gorroto deuskuen guztien eskutik.
Horrela egin deutse gure gurasoei erruki,
bere alkarte santuaz oroiturik;
egin eutson-eta gure guraso Abrahami zin-hitza,
Berak emongo euskula.
Gure etsaien eskutik gu atarata, bildur barik,
izan gaitezan Haren zerbitzari;
zintzo eta zuzen Beraren aurrean,
gure egun guztietan.
Zu, barriz, seina,
Goi-goikoaren profeta deitua izango zara,
Jaunaren aurpegi aurretik joango zara-eta,
Hari bidea prestatzera;
erakustearren Haren herriari salbamena,
euren pekatuen parkamena.
Gure Jainkoaren errai errukitsuekaitik,
agertuko jaku Goiz-eguzkia ganetatik;
ilunpetan eta herio-gerizpean dagozanei argi egitera,
gure oinok bake-bidean zuzentzera.
Aintza Aitari eta Semeari,
eta Espiritu Santuari.
Lehen lez, orain eta beti,
eta amaibako egunetan. Amen.
Ant. Aita, goretsi naizu
zure ondoan, mundua mundu izan baino lehen Nik zeure ondoan neban aintzaz.
Eskariak
Egin deiogun otoitz bere heriotzearen eta biztuerearen bitartez erosi gaituan Kristo Salbatzaileari, esanez:
Jauna, erruki zakiguz.
—Jerusalemera igon zendun, Jauna, nekaldia jasanik, aintzan sartzeko: * eroaizu zure Eleizea betiko Pazkora.
—Kurutzean josirik, lantzaz zulatua izan zinan Horrek, * osatu eizuz gure zauriak.
—Zure kurutzea bizi-zugatz bihurtu zendun Jaun Horrek, * emoiezuz haren frutuak Bateoan berbiztutakoei.
—Kurutzetik zintzilik zengozala, lapur damutuari parkatu egin zeuntsan Jaun Horrek, * parkatu guri, pekatarioi.
(… isil unea, bakotxak bere eskaria egin ahal izan daian).
Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik.
Otoitza
Jainko ahalguztidun betiraunekoa, egizu, parkamena jadesteko eran ospatu daiguzala Jaunaren nekaldiko misterioak. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.
Amaierea
V/.
Bedeinkatu gaizala Jainko ahalguztidunak: Aitak eta Semeak eta Espiritu
Santuak.
R/. Amen.
V/. Goazen Jaunaren bakean.
R/. Eskerrak Jainkoari.
