V. Astelehena

GARIZUMAKO BOSTGARREN ASTELEHENA

GORESPENAK 

Agurra

V/. Zatozkit lagun, ene Jainko.
R/. Jauna, zatoz laster ni laguntzera. 

V/. Aintza Aitari eta Semeari eta Espiritu Santuari.
      Hasieran zen bezala orain eta beti
      gizaldi eta gizaldietan. Amen. 

 

Goratzarrea

 

Salmoak

5. salmoa, 2-10. 12-13

1 Ant. Zuri arrenka nagokizu, Jauna, entzun goizetik nire berbaldia.

Entzun, Jauna, nire eskaria,
    aditu eizu nire intziria.
    Zagoz erne nire deadar-hotsera,
    ene Errege ta ene Jainko. 

Zuri arrenka nagokizu, Jauna,
    entzun goizetik nire berbaldia;
    goizean agertzen deutsut nire eskaria,
    eta zure zain gelditzen naz. 

Ez zara-eta Jainko gaiztakeria-zale,
    gaiztorik ezin da bizi zurean,
    harroek ez dabe iraungo zure aurrean. 

Gaizkile guztiak gorroto dituzu,
   guzur-ontziak hondatzen dituzu.
   Gizon odol-zale ta maltzurrak,
   gorroto ditu Jaunak. 

Ni, barriz, zure maitasun ugariz,
    sartuko naz zurean;
    zure jauretxe deunaren aurrean
    ahuspez jarriko zure bildurrean. 

Jauna, nire etsaiekaitik,
    zure zuzentasunean eroan nagizu,
    nire aurrean zure bidea zelaitu eizu. 

Ez da-eta egiarik holakoen ahotan,
    horreen bihotzak txarkeria dau asmotan;
    hilobi zabaldua da horreen eztarria,
    horreen mihina, zurikeria. 

Zugana batzen diranak, ordea, poztu bediz,
    egin begie oihu beti pozaren pozez.
    Babestu eizuz, eta alaitu bediz zuregan
    zure izena maite dabenak. 

Zintzoa zeuk onesten dozu-eta, Jauna,
    onginahiez inguratzen babeskiz bezela. 

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen.

 Ant. Zuri arrenka nagokizu, Jauna, entzun goizetik nire berbaldia.

 

2 Ant. Goresten dogu, gure Jainko, zure izen argitsua. 

Kantika: 1 Kro 29, 10-13

 Gora zu, Jauna, gure aita Israel-en Jainko,
    betidanik betidaino. 

Zeureak dira, Jauna, indarra ta handitasuna,
    zeureak argia, distira ta argitasuna.
    Zeru-lurretan dagozanak zeureak dira guztiak,
    zeurea, Jauna, jaurerria,
    eta zu, guztien ganetik dagoan buruzagia. 

Ondasuna ta ospea zure dituzu,
    guztietan zeuk agintzen dozu.
    Zure eskuan indarra ta kemena,
    guztia handi ta sendo egitea, zure eskuarena. 

Orain, beraz, gure Jainko, ospatzen zaitugu,
    zure izen argitsua goresten dogu. 

Aintza Aitari eta Semeari,
    eta Espiritu Santuari.
    Lehen lez orain eta beti
    eta amaibako egunetan. Amen. 

Ant. Goresten dogu, gure Jainko, zure izen argitsua.

 

3 Ant. Jauretsi Jauna apainduria deunez. 

28. Salmoa

 Emon, Jainko-seme-alabok, Jaunari,
    emon ospe eta indar Jaunari.
    Emon ospe Jaunari bere izenaren ederrez,
    jauretsi Jauna apainduria deunez. 

Horra Jaunaren berbaroa ur-ganean:
    Jainko itzalgarriaren ostotsa durundan,
    Jauna ur ugarien ganean.
    Jaunaren berbaroa indartsu,
    Jaunaren berbaroa ospetsu. 

Jaunaren berbaroak ditu izaiak apurtzen,
    Libango izaiak Jaunak apurtzen.
    Libani jauzi eragingo deutso, zekorrari lez;
    Sarioni, basa-idiskoari lez. 

Jaunaren berbaroak su-garra dau botatzen,
    Jaunaren berbaroak basamortua ikaratzen,
    Janak Kades-lekaroa ikaratzen.
    Jaunaren berbaroak bihurritzen ditu arteak,
    soiltzen basoak,
    haren jauretxean danek dinoe: Gora! 

Jesarri da uholde-ganean,
    Jauna errege jesarriko betiraunean.
    Bere herriari indar emongo deutso Jaunak,
    bere herria bedeinkatuko dau bake emonez Jaunak. 

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen. 

 Ant. Jauretsi Jauna apainduria deunez. 

R/. Berak atarako nau * ehiztarien saretik. Berak.
V/. Bere hegoez babestuko nau. Ehiztarien.
      Aintza Aitari. Berak.

 

Jainkoaren hitza 

Jr 11, 19-20

     Hiltzera daroen bildots eztia lakoa nintzan ni; ez nekizan ni hiltzeko erabilezan asmoak. «Bota daigun zugatza bere mardulean; kendu daigun bizidunen lurretik; ez bedi gehiago haren izenik aitatu». Baina Zuk, diran guztien Jaun Horrek, zuzen epaitzen dozu, bihotz-guntzurrunak aztertzen dozuz. Ikusiko dot nik, Jauna, ene Jainkoa, harei emoten deutsezun ordaina, zeure eskuetan itzi dot-eta nire auzia.

 

Bened. ant.  Nire ondoren datorrena ez dabil ilunpetan; izango dau bizitzarako argia —dino Jaunak—.

Bedeinkatua Jauna, Israelgo Jainkoa
    agertu eta bere herria askatu dauana;
    salbazino indarra deusku emon,
    bere morroi Dabiden etxean.

Halan eukan berbea emonda bere santuen bidez,
    behinola bere profeta zituenen bidez;
    salbazinoa gure etsaien menpetik,
    gorroto deuskuen guztien eskutik.

Horrela egin deutse gure gurasoei erruki,
    bere alkarte santuaz oroiturik;
    egin eutson-eta  gure guraso Abrahami zin-hitza,
    Berak emongo euskula.

Gure etsaien eskutik gu atarata, bildur barik,
    izan gaitezan Haren zerbitzari;
    zintzo eta zuzen Beraren aurrean,
    gure egun guztietan.

Zu, barriz, seina,
    Goi-goikoaren profeta deitua izango zara,
    Jaunaren aurpegi aurretik joango zara-eta,
    Hari bidea prestatzera;
    erakustearren Haren herriari salbamena,
    euren pekatuen parkamena.

Gure Jainkoaren errai errukitsuekaitik,
    agertuko jaku Goiz-eguzkia ganetatik;
    ilunpetan eta herio-gerizpean dagozanei argi egitera,
    gure oinok bake-bidean zuzentzera.

Aintza Aitari eta Semeari,
    eta Espiritu Santuari.
    Lehen lez, orain eta beti,
    eta amaibako egunetan. Amen. 

Ant.  Nire ondoren datorrena ez dabil ilunpetan; izango dau bizitzarako argia —dino Jaunak—.

Eskariak

      Bedeinkatua, bere heriotzaz salbamen-bidea ebagi deuskun Jesus, gure Salbatzailea. Egin deiogun otoitz, esanez:

Eroaizu, Jauna, zure herria bide zuzenetik.

    —Bateoaren bidez, bizi barria emon deuskuzun Jainko errukitsu Horrek, * egizu, egunetik egunera, zure antzekoago egin gaitezala.

    —Iguzu, gaur behartsuak gure onginahiez alaitu daiguzala, * eta harei lagunduz Zeu aurkitu zaiguzala.

    —Emoiguzu, on, zuzen eta egia dana zure aurrean egitea,* eta beti Zu bihotz-bihotzez bilatzea.

    —Parkatu eiguzu, zure familiako batasunaren aurka egin dogun guztia, * eta emoiguzu bihotz bat eta arima bat izatea.

(… isil unea, bakotxak bere eskaria egin ahal izan daian)

Gure Aita zeruetan zarana,
santu izan bedi zure izena,
etor bedi zure erreinua,
egin bedi zure nahia
zeruan bezela lurrean ere.
Emoiguzu gaur
egun honetako ogia,
parkatu gure zorrak
geuk ere geure zordunei
parkatzen deutsegun ezkero,
ez eiguzu itzi tentazinoan jausten
baina atara gagizuz gatxetik. 

Otoitza

     Jauna, zure grazia neurribakoak era guztietako bedeinkapenez aberasten gaitu; iguzu, pekatuaren zaharkeriatik bizitza barrira etorrita, prestau gaitezala zeruko erreinuaren osperako. Zure Seme Jesu Kristo gure Jaunaren bitartez, Zurekin eta Espiritu Santuarekin batean Jainko eta errege bizi da-ta, gizaldi eta gizaldietan.

Amaierea

V/. Bedeinkatu gaizala Jainko ahalguztidunak: Aitak eta Semeak eta Espiritu Santuak.
R/. Amen.

V/. Goazen Jaunaren bakean.
R/. Eskerrak Jainkoari.